((ترافه))
ترافه وليل ودَكَ ريحان
يا اسمر لا تواخذنه
يَلَن كل دَكَه من حسنك
شتل ريحان للجنه
ليالي ودَكَ نحر حدَّار
واحنه الشوكَ ناحرنه
تحنَّن . دوس فوكَ الروح
واحسبها عَلَي منه
أطكَن ورد من تجزي
وألف نمّام يتحنَّه
بترف جدميك أطيرن فوكَ
فوكَ الفوكَ
أكتَّن عل الورد مزنه
من اشوفك
أنذر النجمات ترجيه لسوالفنا
ووديلك هوى شكابين
وتردني بطركَ ونّه
بوشل هجرك يلمذبَّل
شتلنه العشكَ والصندل
تنينه ، وكل هجر حَمَّل
دمع نيلي ، وسِعد أسود
ترف وانته ولا سِعده
ولا مامش ولا أزود
حسافه اسكَيتك بروحي
وحسافه العمر ما وَرّد .
أخبرك ، روحي تلفانه
تدور بفلك لك حسره
وغرّكَها جرف أسمر حزين
بماي كل عشره
يكَلي أمعبر الطَبكَه
عشكَنا نياحه يا سمره .
يَلمعَبر ، دَصد عينك
لجعة العين ما تبره
تأمل بينا يَحبيّب
رَصعة الحنج
فَي كَمره
نسيت الروح يا يمّه
بطبكَة الترف والزهره
شدهني ، وتَلها من ايدي
وعكَدها بطارف الغتره
أموتن وانت كل ليله
تظل رويحتي بستره
يروحي شكثر عاكَولج
والمجاتل عله الكَطره
تبهذل حالي
كل دَكَه وتذبني بفرح
كل شَمره
الزلف نايل هوى جبوري
وانكَط شفافي عَل جوري
ترسنه صواني فرفوري
فرح نيلي
وصل أسود
ترف وانت ولا ورده
ولا شوكه
ولا أزود
حسافه سكَيتك بروحي
وحسافه العمر ما وَرّد
فرشت شليلي بدروبك
أبيع العشكَ للدنيه
هضيمه ، اتحنِّن الشامت عليّه
وتشتت بيّه
جثير اكَزازك بروحي
واكَولن هاي حنّيه
من أتلّك بالحلم يسمر
يجي القداح بيديّه
واعتّك واطبج بحركَه
رفيف الريه عل الريه
وتسيل دموعي بجفوفك
نبع برمال نجديه
واكَلك وين هلغيبه
سنه ، وبالحلم منسيه
يطيف شويه عاشرنه
الصبح دنياك ، مكَضيه
شَكَلَك ؟ وانت هالمايع
وآنه من الحركَه ، زهديه
يمايل فركَ
كل مايل فركَ
بالعشكَ عاريه
بوشل هجرك يلمذبّل
شتلنه من الحزن مشتل
تنينه وكل هجر وَشّل
دمع نيلي
وسِعد أسود
ترف وانت ولا سِعده
ولا مامش
ولا أزود
حسافه سكَيتك بروحي
وحسافه العمر ما وَرّد
ليست هناك تعليقات:
إرسال تعليق