رسالة
ــــــــــــــ
أتكلمي ليه الصراخ جوا صدرك مكتوم
وليه نوايا اللي محوطينك سحاب وغيوم
وليه ساكته علي حقك وربنا كرمك
بعد ما كان حقك مهضوم
قولي للناس وعرفيهم أنتي مين
وأن ما عرفوك اظهري لهم تعب السنين
وعرفيهم كام من الأولاد صغار صاروا كبار متربيين
عرفيهم أن الأمومة مش بس حضن في عز البرد تدفيهم
ولا بطون جوعانة وأنت بتشقي من اجل خاطر تشبيعهم
ولا الماء اللي حملتيه علي كتفك والجرار شاهده عليهم
عرفيهم وتكلمي
لان خوفي عليك انك تكون حاسة انك ستهزمي
نصرك بين عيونك واضح
ومعالمه في سلوك أولادك
أتربوا في عزك رغم إن الظروف كانت ضدك
وكدتي والله حسادك
اصرخي وارفعي أيدك للسما وقولي يارب
حقي ضاع مع عبد من عبيدك يارب
من أجل راحتي وراحتي أولادي اهديه ليا يارب
بس حسيت إن دموعك سالت من عينيك
وان يدك بتترعش من اللي حساه جواك
حابب ترفعي راسك وتفتخري بوجودك
وتصوني عرضك ومالك وافتكري زمن جدودك
كانت نوياهم صادقة وزمانهم والله جميل
عمر ما بنت شالت الهم ولا شعرت بطول الليل
كانت من قبل ما تقول الأه تلقاهم وياها
يزيلوا الغمة عن صدرها ويعيشوا جواها
تأمن لهم وعرفت أن خلفها رجاله
وحقها عمره ما يضيع أصلهم كانوا رجاله
و النهارده ليه تستسلمي للهم ويبان عليك ضعيفة
حقك لو كان مر قاومي وانزعي من جواك الخوف
ربك سينصفك وهو العالم بحالك
ما تمدي يدك لمخلوق ورزقك جايلك جالك
ــــــــــــــــــــ
محمد رشاد
ليست هناك تعليقات:
إرسال تعليق